ராஜீவ் கொலையாளிகள் விடுதலைக்கு எதிர்பாராத ஆதரவு

0 116

ராஜீவ் காந்தி கொலையில் தண்டிக்கப்பட்டு ஆயுள் தண்டனையை எதிர்கொண்டிருக்கும் ஏழுபேரின் விடுதலைக்கு எதிர்பாராத இடத்திலிருந்து உதவிக்கரம் நீட்டப்பட்டிருக்கிறது. கடந்த 24 ஆண்டுகளுக்கும் மேலாக சிறையிலிருக்கும் முருகன், பேரறிவாளன், சாந்தன், நளின், றொபர்ட் பயஸ் உள்ளிட்ட ஏழுபேரையும் உடனடியாக விடுதலை செய்யவேண்டும் என்று உச்ச நீதிமன்ற முன்னாள் நீதிபதியும், இந்திய பிரஸ் கவுன்சிலின் முன்னாள் தலைவருமான மார்க்கண்டேய கட்ஜு கோரிக்கை விடுத்திருக்கிறார். இது, தமிழகத்தில் கடும் சர்ச்சையை ஏற்படுத்தியிருக்கிறது. கட்ஜுவுக்கும் சர்ச்சைகளுக்கும் எப்பொழுதுமே பஞ்சம் இல்லைத்தான். கடந்த ஆண்டு, 2006 – 2011 திராவிட முன்னேற்ற கழக (தி. மு. க.) ஆட்சிக் காலத்தில் ஓர் ஊழல் கறைபடிந்த மாவட்ட நீதிபதியை உயர் நீதிமன்ற நீதிபதியாக ஆக்கக்கோரி அப்போதைய தி. மு. க. அரசு நிர்ப்பந்தம் கொடுத்ததாக எழுதி சர்ச்சையை ஏற்படுத்தியவர்தான் கட்ஜு. அதேபோல, மகாத்மா காந்தியை பிரிட்டிஷ் ஏஜன்ட் என்றும் கூறி, நன்றாக வாங்கிக் கட்டிக்கொண்டவர். கட்ஜுவின் இந்தக் கருத்துக்களை எதிர்த்தும், இதற்கு கண்டனம் தெரிவித்தும் நாடாளுமன்றத்தில் ஒருமனதாக கண்டனத் தீர்மானங்கள் நிறைவேற்றப்பட்டன. இந்தத் தீர்மானங்களை ரத்துச்செய்யக்கோரி கட்ஜு உச்ச நீதிமன்றத்தில் தாக்கல்செய்துள்ள மனு நிலுவையில் உள்ளது. இதேபோல, தற்போதைய தலைமை நீதிபதி எச். எல். தத்து அளவுக்கு அதிகமாக சொத்துச் சேர்த்துவிட்டதாக கூறி, தொடர்ந்து குற்றச்சாட்டுக்களை ஆவண ஆதாரங்களுடன் கட்ஜு கடந்த சில வாரங்களாக எழுதிவருவதும் சலசலப்பை உண்டாக்கிக்கொண்டிருக்கிறது. கட்ஜுவின் புகார்களுக்கு இதுவரையில் தலைமை நீதிபதி தத்து ஒருவார்த்தைகூட பதில் சொல்லவில்லை என்பது குறிப்பிடத்தக்கது.

இந்தப் பின்புலத்தில்தான் தற்போது தனது வலைப் பக்கத்தில் கட்ஜு ராஜீவ் கொலையாளிகள் அனைவரையும் விடுதலை செய்யவேண்டும் என்று எழுதியிருக்கும் கருத்து கவனிக்கப்படுகிறது. இலங்கைக்கு இந்திய இராணுவம் போனதைக் கடுமையாக கறைகூறும் கட்ஜு, மற்றொரு நாட்டுக்கு இந்திய இராணுவத்தை அனுப்ப ராஜீவ் காந்திக்கு எந்த உரிமையும் இல்லை என்கிறார். இதனால், இலங்கையில் ஆயிரக் கணக்கான தமிழர்கள் கொல்லப்பட்டதுடன், நம்முடைய வீரர்கள் 3 ஆயிரம் பேர் கொல்லப்பட்டதற்கும் வழி ஏற்பட்டது. `இது, தமிழர்கள் மத்தியில் கடுமையான அதிருப்தியை ஏற்படுத்தியிருக்காதா?’ என்று கேள்வி கேட்கிறார் கட்ஜு. `பிரதமர் இந்திரா காந்தி கொல்லப்பட்டபோது `ஒரு பெரிய மரம் வீழ்ந்தால் பூமி அதிரத்தான் செய்யும்’ என்று சீக்கியர்களுக்கு எதிரான படுகொலையை நியாhயப்படுத்திப் பேசியவர்தான் ராஜீவ் காந்தி. இதிலிருந்தே ராஜீவின் புத்தியிலிருக்கும் கிரிமினல் தன்மையை நாம் புரிந்துகொள்ளலாம்’ என்றும் கூறுகிறார் கட்ஜு. தேவேந்திர சிங் புல்லர் உள்ளிட்ட சில மரண தண்டனை குற்றவாளிகளுடன் ராஜீவ் கொலையாளிகள் விவகாரத்தை ஒப்பிட்டுப் பேசும் கட்ஜு, உடனடியாhக முருகன், நளினி, பேரறிவாளன் உள்ளிட்டோர் விடுதலை செய்யப்படவேண்டும் என்கிறார். தன்னுடைய கூற்றுக்கு ஆதரவாக ஆங்கில நாவலாசிரியர் சார்ள்ஸ் டிக்கின்சின் ஒரு நாவலிலிருந்து ஒரு கதா பாத்திரத்தையும் கட்ஜு எடுத்துக்காட்டுகிறார். மத்திய அரசு தவறும் பட்சத்தில் வெளிநாட்டிலிருக்கும் தான், இந்தியா திரும்பியவுடன் இதற்ககான நடவடிக்கைகளில் ஈடுபடப்போவதாகவும் கூறுகிறார். தன்னுடைய இந்த முயற்சிக்கு தேசபக்த இந்தியர்கள் அனைவரும் ஒத்துழைக்ககவேண்டும் என்றும், கும்பகர்ண தூக்கத்தில் அரசு இருந்தால் அதனை விழிக்கச் செய்வது எப்படியென்று தங்களுக்குத் தெரியும் என்றும் கூறியிருக்கிறார்.

எதிர்பாராத இடத்திலிருந்து வந்திருக்கும் இந்த ஆதரவு, தமிழ் ஆதரவாளர்களுக்கு மகிழ்ச்சியை கொடுத்திருக்கிறது. `உச்ச நீதிமன்றம் பல தீர்ப்புக்களில் ஆயுள் தண்டனை என்பது ஆயுள் முழுவதற்கும்தான் என்று கூறியிருக்கிறது. ஆனால், வாழ்வதற்கான அடிப்படை உரிமை என்ற ஷரத்தின்படி பார்த்தால், தண்டனைக்க குறைப்பினை மேற்கொள்ளும்போது அதில் எந்தவிதமான அரசியல் குறுக்கீடுகளும் இல்லாமல் பார்க்கவேண்டியது அவசியம் உள்ளது என்று உச்ச நீதிமன்றம் பல தீர்ப்புக்களில் தெளிவுபடுத்தியுள்ளது. கொல்லப்பட்டவர் சமூகத்தின் புகழ்பெற்ற மனிதர் என்ற விஷயங்கள் இதில் கருத்தில் கொள்ளப்படத்தேவையில்லாத விஷயங்கள் என்று சிரேஷ்ட வழக்கறிஞர் என். நடராஜன் வாதாடியதையும், இதனை ராஜீவ் கொலை வழக்கில் இறுதித் தீர்ப்பு வழங்கிய மூன்று நீதிபதிகள் அமர்வு ஏற்றுக்கொண்டதையும் நாம் இங்கு நினைவுகொள்ளவேண்டும். நான் கட்ஜுவின் இந்த கருத்தை மனப்பூர்வமாக வரவேற்கிறேன்’ என்கிறார், தமிழ்த் தேசம் பத்திரிகையின் ஆசிரியர் தோழர் தியாகு. கட்ஜுவைக் காய்த்தெடுக்கிறது காங்கிரஸ் கட்சி. `கட்ஜு தன்னுடைய புத்தி சுவாதீனத்தை இழந்து சில ஆண்டுகளாகிவிட்டது. இந்திய நாடாளுமன்றம் ஏகோபித்த தீர்மானத்தை கட்ஜுவுக்கு எதிராக நிறைவேற்றியிருக்கிறது. வயதாகிப்போன, புத்தி சுவாதீனமில்லாத, மலிவான விளம்பரத்துக்கு அலைந்துகொண்டிருக்கும், தெருவில் திரிந்துகொண்டிருக்கும் ஒர நபரின் கருத்துக்கு நான் பதில் சொல்ல விரும்பவில்லை. பெரும்பாலான இந்தியர்களின் நிலைப்பாடும் இதுதான் என்பதற்கு இந்திய நாடாளுமன்றத்தின் தீர்மானமே சாட்சி’ என்று கூறுகிறார் காங்கிரஸ் பிரமுகர் அமெரிக்கை நாராயணன்.

1991ஆம் ஆண்டு தேர்தல் பிரச்சாரம் செய்வதற்காக சென்னை அருகிலுள்ள ஸ்ரீபெரும்புதூர் வந்த முன்னாள் பிரதமர் காந்தி மனித வெடிகுண்டால் கொல்லப்பட்டார். இதுதொடர்பான விசாரணையை மேற்கொண்ட இந்தியாவின் முன்னணி புலனாய்வு அமைப்பான சிபிஐ இதில் மொத்தம் 41பேர்மீது வழக்குத் தொடர்ந்தது. இதில், விடுதலைப் புலிகள் தலைவர் பிரபாகரன், பொட்டு அம்மான் உள்ளிட்ட 15பேர் சிபிஐ அதிகாரிகளால் கைதசெய்யப்படாததால் அவர்கள் தேடப்படும் குற்றவாளிகளாhக அறிவிக்கப்பட்டனர். மீதமுள்ள 26பேருக்கு எதிராக சென்னை பூந்தமல்லி சிறப்பு நீதிமன்றத்தில் சிபிஐ வழக்கினை நடாத்தியது. இந்த வழக்கினை விசாரித்த சிபிஐ சிறப்பு நீதிபதி நவநீதம், 26பேருக்கு தூக்குத் தண்டனை விதித்து ஜனவரி 28ஆம் தேதி 1998ஆம் ஆண்டு தீர்ப்பளித்தார். அகில உலகமும் இந்தத் தீர்ப்பினை அருவருப்புடன் பார்த்தது. இரத்த வெறிகொண்ட, பழிவாங்கும் தன்மைகொண்ட தீர்ப்பு இதுவென்று பரவலாக, மனித உரிமை ஆர்வலர்கள் உள்ளிட்டோரால் இந்தத் தீர்ப்பு விமர்சிக்கப்பட்டது. இந்த வழக்கு மேல் முறையீட்டுக்குப் போனபோது இந்த வழக்கில் 19பேரை உச்ச நீதிமன்றம் விடுதலை செய்தது. மீதமுள்ள ஏழுபேரில் மூன்றுபேருக்கு ஆயுள் தண்டனையும், மற்றைய நால்வருக்கு மரண தண்டனையை உறுதிசெய்தும் உச்ச நீதிமன்றம் தீர்ப்பளித்தது. இதில், நளினியின் மரண தண்டனை காங்கிரஸ் கட்சித் தலைவி சோனியா காந்தியின் தலையீட்டால் 2000ஆம் ஆண்டில் ஆயுள் தண்டனையாக குறைக்கப்பட்டது. பேரறிவாளன், முருகன், சாந்தன் ஆகிய மூவரின் கருணை மனுக்களை இந்திய குடியரசுத் தலைவர் 2011ஆம் ஆண்டு ஓகஸ்ட் மாதம் தள்ளுபடி செய்தார். அவர்களை அந்த ஆண்டு செப்ரெம்பர் 9ஆம் தேதி தூக்கில்போட முடிவுசெய்யப்பட்டது. ஆனால், இந்த மூவரின் மனுக்களை விசாரணைக்கு ஏற்றுக்கொண்ட சென்னை உயர் நீதிமன்றம் அந்த ஆண்டு ஓகஸ்ட் 30ஆம் தேதி அவர்களை தூக்கிலிட தடைவிதித்தது. பின்னர், இந்த வழக்கு உச்ச நீதிமன்றத்துக்கு மாற்றப்பட்டது.

இதனிடையே, இந்த மூவரின் மரண தண்டனையை ஆயுள் தண்டனையாக உச்ச நிதிமன்றம் 2014ஆம் ஆண்டு பெப்ரவரியில் குறைத்தது. இவர்களது விடுதலையை தமிழக அரசு முடிவுசெய்துகொள்ளலாம் என்றும் கூறியது. இதனையடுத்து, இந்த மூவரையும் விடுதலை செய்யப்போவதாகவும், மூன்று நாள்களுள் இவர்களது விடுதலையை மத்திய அரசு அங்கீகரிக்காவிட்டால் மாநில அரசே இவர்களை விடுதலைசெய்துவிடும் என்றும் முதலமைச்சர் ஜெயலலிதா சட்டமன்றத்தில் அறிவித்தார். அது, நாடாளுமன்ற மக்களவைத் தேர்தல்கள் நெருங்கிவந்துகொண்டிருந்த நேரம். அனால், அந்த மூன்ற நாள்களுள் அப்போதைய டாக்டர் மன்மோகன்சிங் தலைமையிலான மத்திய அரசு உச்ச நீதிமன்றத்துக்குப்போய் தமிழக அரசின் முடிவுக்கு தடை வாங்கியது. மேலும், இந்த விவகாரத்தை ஐந்து நீதிபதிகள்கொண்ட அரசியல் சாசன அமர்வு விசாரிக்கவேண்டும் என்றும் அப்போதைய தலைமை நீதிபதி சதாசிவம் தலைமையிலான அமர்வு உத்தரவிட்டது.
அரசியல் சாசன அமர்வு விசாரிப்பதற்கு ஏழு முக்கிய கேள்விகளையும் உச்ச நீதிமன்றம் வகுத்துள்ளது. இதில், ஆயுள் தண்டனை என்பது ஆயுள் முழுவதற்குமா அல்லது 14 ஆண்டுகள் மட்டும்தானா, மத்திய சட்டங்களின்கீழும் மத்திய புலனாய்வு அமைப்புகளும் கைதுசெய்பவர்களை மாநில அரசுகள் சிறையிலிருந்து விடுதலை செய்வதற்கு அதிகாரம் உள்ளதா போன்ற முக்கிய கேள்விகள் எழுப்பப்பட்டிருக்கின்றன. ஜூலை 10ஆம் தேதி வேறொரு வழக்கில் கருத்துத் தெரிவித்த உச்ச நீதிமன்ற தலைமை நீதிபதி எச். எல். தத்து மரண தண்டனைகள் சம்பந்தமான வழக்குகளை விரைவில் விசாரணைக்கு எடுத்துக்கொள்ளப்போவதாக கூறியிருப்பது முக்கியமானதாகப் பார்க்கப்படுகிறது. இந்த ஏழுபேரின் வயிற்றில் பாலைவார்ப்பதாகவே தலைமை நீதிபதி தத்துவின் கருத்து பார்க்கப்படுகிறது.

ராஜீவ் கொலையில் தண்டனைவிதிக்கப்பட்டவர்களின் விவகாரம் அரசியல் சாசன அமர்வுக்கு மாற்றப்ட்டது இந்தியா முழுவதிலுமுள்ள நூற்றுக்கணக்கான ஆயுள் தண்டனைக் கைதிகளின் வாழ்வையும் கேள்விக்குறியாக்கிக்கொண்டுள்ளது. ஏனெனில், நன்னடத்தை காரணமாக தலைவர்களின் பிறந்த நாள்களில் இவர்கள் விடுதலையாவதும் தற்போது தடைசெய்யப்பட்டுள்ளது.

இந்த சூழ்நிலையில், உச்ச நீதிமன்றத்தில் அரசியல் சாசன அமர்வின் முன்பு ஏழுபேரின் வழக்கு நிலுவையில் உள்ள விவகாரத்தில் கட்ஜுவின் கருத்து அதில் ஏதாவது தாக்கத்தை ஏற்படுத்துமா என்று தெரியவில்லை. இது, மாற்றத்தை ஏற்படுத்தலாம் அல்லது மாற்றத்தை ஏற்படுத்தாமலும் போகலாம் என்பதே ஆய்வாளர்களின் கருத்தாகவுள்ளது. இதனிடையே, முன்னாள் குடியரசுத் தலைவர் அப்துல் கலாம் இந்தியாவில் மரண தண்டனை முற்றிலுமாக ஒழிக்கப்படவேண்டும் என்று கூறியிருப்பதும் முக்யிமான விவகாரமாக பார்க்கப்படுகிறது. இந்தியா முழுவதிலும் மரண தண்டனைக்கு எதிரான குரல்கள் ஓங்கி ஒலிப்பது ராஜீவ் கொலையில் குற்றம்சாட்டப்பட்டிருப்பவர்களுக்கு சாதகமாக முடியலாம் என்றே கருதப்படுகிறது.

ராஜீவ் காந்தி கொலையுண்டு வரும் 2016ஆம் ஆண்டு மே 21ஆம் தேதியுடன் 25 ஆண்டுகள் முடியவிருக்கின்றன. கால் நூற்றாண்டு காலம் ஓடி மறைந்துவிட்டது. அடிப்படையில் இந்தப் படுகொலை ஓர் அரசியல் படுகொலை என்பதால் இதில் சம்பந்தப்பட்டவர்கள் அவர்கள் 25 ஆண்டுகளை சிறையில் கழித்துவிட்ட காரணத்தால் விடுதலை செய்யப்படவேண்டும், புதிய வாழ்வு வாழ அநுமதிக்கப்படவேண்டும் என்பதுதான் மனித உரிமை ஆர்வலர்களின் கருத்தாக உள்ளது. இந்தப் பயணத்தில் நீதிபதி கட்ஜுவின் கருத்து அதற்கு உதவியாக இருக்கலாம் என்றே பார்க்கப்படுகிறது.

ஆர். மணி

Leave a reply

Your email address will not be published. Required fields are marked *

Nazhikai International Tamil Newsmagazine
ISSN 1357-6933
Tel: 00 44 208 422 5699
Fax: 00 44 208 728 2334
Email: pannews@hotmail.co.uk
Editorial: editor@nazhikai.com / letters@nazhikai.com
Annual Subscription (12 issues):
UK £22.00
Europe £30.00
Canada $30.00
India Rs200.00
All Other Countries £35.00
Payable to Pannews Limited
Canada:
880 Ellesmere Road,
Suite 204, Toronto,
ON. M1P 2W6
Tel: 416 613 2770
Editor: S Mahalingasivam
Published by: Pannews Limited 123 Twyford Road Harrow Middx HA2 0SJ